نجيب ساويرس يصف صفقة رأس الحكمة بالمنقذة

أشاد المهندس نجيب ساويرس رجل الأعمال المصري الشهير، بإبرام الحكومة صفقة رأس الحكمة مع الجانب الإماراتي، قائلا: صفقة لها وضع خاص ولا أعتقد أنها ستتكرر، وتعتبر فريدة من نوعها نظرا لتوقيتها مع مرور الدولة بأزمة كبيرة في سعر الصرف وسوق مضطرب في العملة وتوقف المصانع وعدم القدرة على تلبية الاحتياجات من أجل الإنتاج وارتفاع أسعار السلع الغذائية والديون التي تقدر بـ170 مليار دولار وأقساط ديون مستحقة الفترة المقبلة.
وقال ساويرس في تصريحات صحفية: “واضح إن مكنش عندنا ما يكفى لسداد أقساط الديون، فلما ييجي حد وينقذك في الوقت ده فدا أمر كويس جدّا”.
وأضاف: “كمية المشاريع القبيحة اللي اتعملت في الساحل الشمالي ومساحات الشواطئ اللي باظت.. الإماراتيين لما ييجوا هيخلوا المستوى زي مدينة دبي، لإنهم عندهم فكر متطور ومنظمين، واللي ينزل دبي وأبو ظبي يحلف بيهم، وإحنا كمطورين هنعلي من أسلوبنا ونقلل من أسعارنا، ونخدم الناس أحسن ولما ييجوا يبنوا هيشغلوا كل الشركات المصرية، وهيوفروا فرص عمل كتير، والمرتبات هتعلى وهيخلقوا مدينة جديدة على أعلى مستوى نصف الساحل الشمالي.. وكلنا هنستفيد ومشاريعنا جنبهم أكيد هتستفيد، مينفعش في ظرف زي ده وييجي حد يساعدنا ونيجي نلاقي اللي يفهم وميفهمش يتكلم”.
واستطرد ساويرس قائلا: “مشاريع الإماراتيين بتبقى مظبوطة، وبيستعينوا بمكاتب عالمية تعمل لهم معمار على أحدث ما توصل إليه العلم، وبيعملوا دراسات جدوى على أعلى مستوى، وبيحافظوا على البيئة وهيعملوا مطار دولي في منطقة مفيهاش مطارات للسياحة العالمية، وبيعملوا مدن ذكية وبيطوروا أي منطقة بشكل كبير”.
وأكمل: “فيه ناس يقولوا لك هياخدوا أرضنا.. ده كلام مينفعش يتقال.. يعني هياخدوها ويرجعوا بيها على دبي ولا أبو ظبي يعني؟!”.